Ein preposisjon er eit ubøyeleg ord. Han vert også kalla styreord eller forholdsord. Ein preposisjon seier noko om korleis noko eller nokon er plassert i forhold til noko anna.

Eksempel på preposisjonar:

• av, gjennom, mellom, rundt, bak, hos, mot, til, blant, i, innan, innanfor, ovanfor, frå, med, på grunn av, ved hjelp av

Preposisjonar og andre ordklassar

Preposisjonar kan stå saman med substantiv, pronomen eller verb i infinitiv.

Eksempel:

• Ugla sat på greina.

• Eg fekk ein kyss av deg.

• Du er glad i å syngje.

Kor nokon eller noko er

Preposisjonar kan fortelje kor noko eller nokon er.

Eksempel:

• Katten er under stabburet.

• Vintermørkeret har senka seg over Svalbard.

Tid

Preposisjonar kan også fortelje om tid.

Eksempel:

• Det er fint om du kjem før klokka sju.

Abstrakte forhold

Preposisjonar kan markere korleis ledd fungerer saman i abstrakte forhold.

Eksempel:

• Det er håp om ro.

Ved stadnamn

Framfor dei fleste norske stadnamna nyttar vi i, men framfor ein del namn er på den rette preposisjonen frå gammalt. I dag er i på frammarsj og kjem inn også ved mange namn i den siste gruppa, særleg by- og tettstadnamn.

Eksempel:

• Eg er i Oslo.

• Katrine bur på Voss.

Preposisjonsuttrykk

Preposisjonen og det ordet han står saman med, kallar vi preposisjonsuttrykk.

Eksempel:

• Eg søv i senga.

• Veslebror sit på golvet.

Øvingar

Øving 1	Øving 2